الأحد، 26 أغسطس، 2012

روح خفيفة





كل حاجة مؤجلة بتكون حمل نفسى عليك
فرض عداك ولسه مصلتوش
كتاب فى قائمة الانتظار مقرأتهوش
ميل مهم لسه مفتحتوش
حد من اهلك من فترة مزرتوش
اعتذار مأجله

او كلام مهم كان المفروض يتقال ومقلتوش
اعمل كل المتأخر عندك وبجد هتحس ان روحك خفيفة

ساعة العمر




وتبص فى ساعه العمر
تلاقى الوقت اتأخر
ترفع عينك للسما
تلاقيها عليك بتمطر
الطفل جواك يصحى
تفرد ايدك وتتمختر
ترجع شاب فى ثانيه
وكل الهموم تتبخر

ما تفكها بقى


 
 
اتفضل سمعاك
عندك مشاكل ومكتئب
ربنا يكون فى عونك - بس لو تسمحلى مش تتفيه من مشاكلك ولا حاجه
بس عندى كلمتين
انت بتاكل اللى نفسك فيه ولو والدتك كررت الاكل مرتين فى نفس الاسبوع بتكون مش طايق نفسك
بتلبس اللى على مزاجك وعندك دولاب صيف شتا مش بيفضى - لأ وكمان عندك كام شوز يليقوا على لبسك وساعات ونضارات - اه حاجات مش براند بس لايقه عليك
بتخرج مع صحابك وقت ما تكون زهقان و بتدخل سينما و تتغدى بره وتصرف اللى يأكل عيله اسبوع
بتدخل نت تشوف الاخبار و تضحك على الكومنتس اللطيفة من صحابك ومتابع اخبار الدنيا بره وجوا

ممكن تكون مشكلتك انك لسه مش لاقى شغل - او بتشتغل ومش مرتاح او مش لاقيه ابن الحلال او ظروفك مش مسعداك على الارتباط او متخانق مع اهلك

بس عارف فى ناس مشكلتها (ال لقمة ) المم يعنى

فى ناس مشكلتها انها بتنام فى الشارع و من غير عشا
ومتعرفش من الاكل غير الجبنه والفول ( شفت ده بعينى)
وبالنسبة للملابس حدث ولا حرج , متهيألى بتشوف بنفسك فى الشارع

الصياد لو فى يوم اصطاد سمكه واحده بس زياده بيحمد ربنا ويبوس ايده وش وضهر ويقول ده كرم ربنا
انت حمدت ربنا على الى عندك قبل ما تفكر فى اللى مش عندك؟

جرب يوم كده فى الصيف تنزل تلف على رجلك فى الشوارع او تقف تبيع زى الباعة المتجولين من اول اليوم لأخره معاك بس بق ميه وساندوتش فول - عشان تطلع بأى رزق

جرب يوم فى الشتا تنام من غير التكييف ولا ال15 بطانيه - جرب ونام فى البلكونة واتغطى بأقدم بطانية عندك و جرب الاحساس

هتقولى الناس دى ليها حياتها وانا ليا حياتى وربنا بيدى كل واحد على اده
هقولك صح بس الناس دى على فكرة مبسوطه وبيضحكوا ويهزروا و يتجوزوا وكل حاجه - بيس يعنى

ظروفك احسن من ظروف غيرك - ولو بجد جربت يوم تفكر فى غيرك وفى المشاكل اللى ممكن تكون عنده واحساس الانكسار والظلم وقلة الحيلة - هتعرف انك بتدلع :(

انت رغم كل النعم اللى ربنا ادهالك - سايب كل ده وبتبص بس للى ناقصك
مفيش مشكله ملهاش حل - لأن ربنا موجود وده معناه انك ليك ضهر فى الحياه
لو انت عايز ده !!!
احمد ربنا على اللى فى ايدك واعمل اللى عليك واطلب من ربنا اللى انت عايزه

ما تفكها بقى :)

بعد يومين كتب كتابنا



بعد يومين كتب كتابنا
عارف , من سنين بسأل نفسى مين ده اللى ممكن يخلينى ارتاح ليه وائتمنه على نفسى
مين ده اللى ممكن يعدى كل الحواجز اللى بنتها حواليا
مين اللى ممكن يكون اول حد احتاجه
واكتر حد بيفرحنى
عمرى ما تخيلت ان الحلم هيتحقق زى ما انا عايزة واكتر بكتير كمان
عمرى ما تخيلت ان مش بس هالاقى حد فيه اللى انا محتاجاه لأ انا متأكده ان مفيش فى الدنيا حد مناسب ليا اكتر منك
بحمد ربنا كل يوم فى صلاتى انك نصيبى وانك شريكى فى العمر اللى جاى وبدعى ربنا يباركلى فيك وتكون راضى عنى دايما
يمكن حصل بينا كام خلاف صغير فى وجهات النظر او فى بداية ما اتعرفنا على بعض وخلال فترة الخطوبة - بس ولا مرة فكرت ان الخلاف هيوصلنا لطريق مسدود
بالعكس كل خلاف بيقربنا من بعض اكتر وبنتمسك ببعض اكتر وكأننا بنعند فى المشاكل ونقولها برضه احنا لبعض :)

بعد يومين كتب كتابنا
بحبك اوى مش هعرف اقولها اد ما بحسها - بس ربنا يقدرنى واثبتهالك كل يوم فى حياتنا الجايه - ربنا يجعلنا الخير لبعض ويجعل فى عمرنا سوا البركة

بعد يومين كتب كتابنا
قصة حبنا مش هتخلص دى لسه يادوب هتبتدى :)



 

الأربعاء، 25 أبريل، 2012

طول ما انت تعبان نفسيا...

طول ما انت مخنوق ومضايق ومكتئب
وتعبان نفسيا
مش هتعرف تعمل حاجه صح فى حياتك ولا تستمتع بيها
هتعدى الايام وتكبر وفجأة تصحى تلاقى نفسك اكبر من كل المشاعر اللى كان نفسك تحس بيها
اكبر من كل الحاجات اللى كان نفسك تعملها
فجأة تفهم ان عمرك ضاع فى ال لاشىء
فى انتظار حاجه انت نفسك مش عارفها

طول ما انت تعبان نفسيا - هتمشى غلط وهتشوف كل حاجه حواليك غلط

طول ما انت تعبان نفسيا - مش هتعرف تقرب من ربنا لأنك لو قربت من ربنا هتفهم ان كل قدر المسلم خير وان كل حاجه بتحصلك انت لو مش السبب فيها ,فربنا بيحضرك لحاجه مهمة جايه ادام

طول ما انت تعبان نفسيا - هتخسر ناس كتير كانوا بيحاولوا يقفوا جنبك بس فى عز حزنك ملاحظتش ده واديتهم ضهرك وقفلت على نفسك

طول ما انت تعبان نفسيا - هتفقد الثقة فى نفسك بالتدريج لأن مفيش حاجه بتعملها بتوصلك للنتيجة اللى انت عايزها ( من وجهة نظرك )

طول ما انت تعبان نفسيا - حتى لو الفرح دق بابك مش هتحس بيه لأنك حاكم على نفسك بالحياة حزنا

طول ما انت تعبان نفسيا - مفيش حاجه هترضيك لأنك الاولى ترضى بقضاء ربنا وتحاول تتغير عشان ظروفك تتغير بالتبعيه

طول ما انت تعبان نفسيا - مش هتعرف تعييييييييش


اصحى بقى و قوم واستمتع بحياتك و عيييش واضحك والاهم من كل ده اعمل اللى عليك - حاااااول فى كل الاتجاهات - حب كل الناس - ساعد اللى يحتاجك وسيبها على ربنا

حتى لو عندك مشاكل ومين معندوش :)

25/4/2012